Athsingyurü thsa liro-pü müyurüti ko sakholiyahmülung dikehnung nengdang apu nguchikhung peh-pü kang anyahli mülung papa la dikehroba Amahator yangdong suro nyitsarü atsa Azii. Kirithong Sangtam te yuthüpta licho ko ihsa te alahtsah lanü changtare.
Khutsichola apu nguchicho-ti atrong lile ko hütsüri yola ate ihsa ngah-nü nguba khüdu tsü, Eastern Nagaland la akhudiba M.Div degree jühba tsü Oriental Theological College, Yangli lile ko OTC kuhshirüti asi külüpba mahkhang akhihrüti nengdang dhsütah apüm pisa dhrüze jüh nguchicho dhingchehcho.
Sakholiyahmülung mahkhang mülung papa la langnü dikeh te, langnürü tsü ajowü-uba mahkhang ajingki-uba kang-nü dikeh nguchinung dhsütahle pü anyichonung atsa ihsa akhihrüti te sobhojühre.
Nü langnüba bekhyah khüta aroh langnürüti te chingkehcho ko khyangchi liba la akohngu nguchicho?
Mülung papa adrong la nguchi rote; ihnü dhingchehba ko nyichoba tsü, aroh khiyoh la nguchirüti suro lili, tase ko lümlong nyichonung dhsütahcho. Aroh langnürüti chah mücilangrangba jingchocho ko hi khu lüpcho nguchi la tu mütohnye akohngu langnü-nü nguchicho.
Langnüba la tuturü yangthsa-ti bichinung changta nyüro?
Amülung langnüba la athah thsacho mahkhang khiyoh la zehcho thsa lahkeh, palunü ajowüuba mahkhang ajingki-uba lanü dikehnung dhsütahle. Nguchi lümchung ko dhingkeh ti tsü atsaubala nünyichonung dhsütahle hi khu nguchi lümchung-ti tsü akohngure. Langnüba bekhyah la akohcho-nü aroh langnürüti müdhekhyünung ko shangrüti chah jiyüh-kehba ti tsü müdhekhyünung dhsütahle. Atungte thsa adikehlanü akehta tsü linung dhsütahle.
Amülung la münyisita lide, tu khüta nguchinung dhsütahro?
Khiyuchüro lite mahkhang münyisihta lide, mücipehba mahkhang zichüroba müli nung. Atbacheh lümlong lanü yuchang (khiyu chürocho hütsü müdhe) yangchinung ko külüpchinung müküpnung. Dhsütahkhang axangchehrüti te chingkeh-nü khiyu mahkhang münyisitaba tsü nyisita-nü külüpnung.
Nüh atrong la nguchi rocho ko ihrü-nü yuchirocho ta nüh langnüba la kohchehkohba (Achievement) tungte khüdu tsü tu-o?
Khutsiba bekhyah USSC Chairman thsade, nguchi lümchung khütu chungcho ko choo dhüroh pohki-nü nguchi tsü thümnung rungnümcho ko hütsüba nguchi tsü akohngucho.
- Yangdong apüm la tbükhüm külüpcho
- Yangdong apüm la shüka kangti kangnung nguchicho ko
- Yangdong müipi pekhyahkuh külüpcho
Nguchi rocho-ti (Khutsichola ko ate)
- Athridirü yola khihyoh, Amahator Range Students’ Union
- ENSF la Athsüchirü (Advisor) 2010 – 2012
- USSC la Assistant Finance Secretary ko Executive Chairman (2008 – 2012)
- ENPO la kang dhüroh (6) tashi Central Executive Committee khiyoh licho
- State Vice President, Bharat Scouts & Guides
- OTC Board of Directors yo Chairman kang 2024 lanü ate tashi nguchiyale.
Ihsa OTC dhingmüthe-te, khutsiba OTC ko chünye OTC dee papa kangcho ngure, (tungte thsa infrastructural developmental ko courses). Hiba azikeh nengdang nüh-nü nüpü nührü khüta nguchicho?
Ih Oriental Theological College, yangli la Board of Directors la Chairman khihyoh te, akhudiba ihrü nguchichung tsü amüdherüti, yucho müirüti, trotarüti ko tikehdhing lirüti lihmüdüm papa la linye yangchi-nü apüm te chingkeh lümlong changta licho ko ihsa sakholiyahmülung la azibarüti, langnürüti ko müyurüti atrong-nü trota lirocho.
Ihrü yo lümchung tsü OTC tsü shangsi ko alimih zikeh tsiba aichi nguchinung dhrongchehcho.
OTC ate liba Board khu azikeh hiri lile:
- Eastern Nagaland la akhudiba Master of Divinity (M.Div) degree nyichokhyüba dikehcho
- Digital Library (Vakhiji) külüpjühcho
- Akhih-kuhchongsah asang alaa kikeh asi külüpjühcho
- Kingkurüti nengdang hostel ahi chah lahkeh külüpjühcho
- Akhudiba M.Div degree khihrüti nengdang OTC Board khiyoh apüm-nü sponsor thsacho
- CCTVs, Intercom ko PA kohroti (equipments) classroom apüm la zahkeh lile.
- Smart interactive panel for online classes
- Smart classroom for M.Div sponsored by USGOU