Mübünyü Tsohsu 15, 2026 nyümong, yumüdong, “Shangnü shang liba Abüdongba” chah jükeh Thahekhu yangdong ko Baptist Lithro kang Nyührepü münga (75) pisacho künyangthsüti la nyitsarüti hajar milang palu müdheyah jengki lanü shibülongcho. Hiba thüpcheh tsü Tsohsu 15 lanü dikeh 17, 2026 tashi khyünung.
Thüpcheh tsü Thahekhu Baptist Lithro amübükuh asi lanü khyücho
Künyangthsüti yumüdong chah jükeh, WSBAK Executive Secretary Rev.Dr. Phughoto Sema-nü Baibel lanü Yangthsaba Nebuchadnezzar yukheh bichi-nü mübüthsingyucho. Tsingrangba-nü adikehrüti tpurü Thahekhu ko tpurü Hejeto anyü sü nücho ko chünye yangdong kang 75 pisacho, hi nengdang Abüdongba nengsenung shibülongrü te thsingyucho. Mütozah adikeh langnürüti yudsi khu WSBAK nengdang amüsuhdi thsachoe-pü abi-nü changtacho.
1951 kang tpurü Thahekhu-nü yangdong thride kuhdong 14 ko mono 61 licho. Sakholiyahmülung nengdang adikeh tpurüti khüdang dhsangthsi lirocho ta ate dhingmüthede yangdong la kukhi ko mono atrong kang zikehcho. Khutsiba la langnürüti ko ate langnürüti-nü akang jühcho ko dhrüze jühcho khu ate yangdong monoti amüwanung akünyangnung ngure pü Azii. K Kakheho Yepthomi-nü salüm seyohjü-nü changtacho.
Adikeh thüpcheh la, künyangthsüti mungba amüdhe thsa nengthsashü asang zingkehcho. Yangdong nengthsashü tsü Azii. K Kakheho Yepthomi-nü zingkehcho, 75 künyangthsüti nengthsashü tsü Gen. Samson Aye-nü zingkehcho ko Lithro nengthsashü tsü TVBC Senior Pastor Rev.Dr. Yehevi Jimo-nü zingkehcho.