Lümchung khürü nengdang tohlinye, anguchinung ti nengdang bekhyah ko thsathsa atsa lede shirüre!
Shithsabhüleh, müdrongchehmülung apüm la trota lirü ko surolili külüpchinung la tase jührü dhrezarü Seyochung yangdong suro nyitsarü atsa Alopu. Longtili C Sangtam-nü ate azikeh shang aichi müyurüti khyang lüpcho lang papa khu tsüptsi-müdhesohba (Awareness) ko tungte thsa akhihzarüti nengdang nguchicho rocho ko nguchiyale. Apu nguchiti chah lahkeh, lihpikihna.org nengdang sü social media ko chingkehba lümchung khu khütang akang jühcho.
Longtili te thüptayu licho ko lümlong, lümyo thüptacho ihsa te changtare.
Hühüe Azii!
Nüh ate müdrongchehmülung papa la dhrüze jühba yuchire ko amülung papa adrong khiyoh la zehcho yuchire. Hütsüri tsü tuturü-o?
- Athridirü, Akehta Amülung (NGO)
- Nature SBI Foundation (CSR)
- Seyochung Village Students’ Union yo President
- Sangtam Students’ Union Kohima yo President
- Ura Cab Kiphire la tungte athah thsa nohlüm khyü nguchiyale
- Athridirü, Anar Tours Agency
- Eastern Mirror nengdang yusihirü
- Member, Development Board, USBLA
Suro lili nguchi ti nengdang thüptanung khüta!
Itpurüti, jünirüti ko shangrüti adrong-nü lümlongti jühcho chah lahkeh nohlüm khyüjüh-nü dhrüze jühcho khu ate tashi la akohngu role. Ih khih bekhyah-nü ihsa suro lili ko müyurüti nengdang nguchinung lümnü licho. Azibarüti adrong-nü rezehsohcho ko khiyu papa aichi nguchinung mahkhang amülung la khüta dhrüze jühnung hiri lümkehsoh-nü licho. Hi khu ate tashi arünü jühba lümlong hiri bichi müzah-müki nü dhrüze jüh trotayale.
Nühnü nguchicho khu ihsa sakholiyamülung la khüta ajingcho ngunung longdiro?
Kang münga-dhüroh kahla, Nyichoji ko athsingyurüti, Muikuh la nguchirüti, Thsaxüküm achangsahchung la nguchirüti, azibarüti, lushu papa la tikehdhing nyitsarüti ko axangcheh nyitsarüti atrong shirücho ko nyichocho.
Hiri anyichoba lümkeh-nü dhsütah aichi mahkhang nguchi aichi dhrüze jüh nguchirole ko mütohzah nguchinung lile.
Nühnü kohchehchoba nguchiti khürü changtanung khüta?
Akhihrü nengdang ko nyichoji-ti la vakhiji akang lisohnung ko Vakhiji la bichinung thsa vakha ti dhribülung-nü Zisaji Presientcy College Kiphire khyang jühcho. Hiba nguchi nahdhingkeh tsü akhihrüti khih thümpü hodhing-nü tohtah la akohngusohnung longdii-nü SVSU khu dhrüze jühcho
Seyochung yangdong la Health & Wellness Centre (HWC-SC) lile ta mui kükyü-nü mülicho. Hiri dhingcheh SVSU khu mui bekhyah-bekhyah la mui lih-nü thangchi trocho.
Akhüluba bichi-nü shithsabhülehrü nengdang, ko ate shang la technology hi tungte thsacho khu, Ura Cab Kiphire la dikehjühcho. Hiba khu, akhüluba dhsütahrü ko amüking-birü nengdang thsathsa atsa lile.
Limih palang kyo tase mühle, ta Ihsa lih la kihnyübong atsa, müyah tu liba azong ko mürong-ti, yongkhi-ti ko liliyah hiri sobho-nü dhikehnung tsü athsalang ko aleng licho khu Tourism nguchi-nguyang la nohlüm khyücho. Hi khu shitseh rorüti nengdang atroba ko atsauba lanü mungnung nengdang dhrüze jühnung. Hiri tsü Ura Cab ko Social media khu ihsa lih lanü yahthri ti khyü mütohzah sobhojühre.
Nguchi akohnguchoti tsü mütohzah lile ko hiri apüm tsü dhsütah aichi mahkhang khiyu aichi nguchicho.
Bekhulang anguchinung lümchung?
Bekhulang nguchi dhingkeh tsü dee amülah lümchung kyo mühle, ta sakholiyahmülung nengdang anguchinung ko kunuti nengdang thsathsa atsa nengdang nguchinyüre ko mütohzah ihsa liliyah atsüptsi nguchi khu asurolangrü-ti nengdang thsathsa atsa hironung lümre.
Tungte thsa, bekhulang nguchi lide, sakholiyahmülung azikeh nengdang mütohzah drengdreng ko alongdi amülah lile.