Dimapur la liba Yangliza shajaji la The Gatekeepers-nü chehcho, Nagaland Revival and Healing Festival 2025 dikehcho ko adikeh romang nyitsarü hajar milang shibülungcho.
New Life Music Nagaland, Dimapur Christan fellowship, Limitless Generation ko Harp Generation, hiri mülungti-nü khi nüchi-nü dikehcho ko tungte Thüpcheh tsü 5 anyüzehlang dikehcho.
Apostle Ankit Sajwan-nü shibülungrüti te akyangba, akehta ko Khrista tsüptsi-nü akang mülichinung thsingyucho. Ahechi nyükhi ihsa te lile ko Jisu-nü akang mülichijühnung yingle pü thsingyucho. Ih Khristan nengdang throcheh-nü rocho mah, ta Khrista nengdang trocheh rocho-e pü mütohzah yochilicho. Lithro papa ko amülung papa aroh khüdu thsa shibülungcho dhingmüthe te, ninglanglih sü hiroh-i linung-e pü künyang changtacho.
Apu akang yuzi changtacho chah lakeh, abi-nü shibülungrüti- te amüsa yu chah xihmülang pü thsingyucho. Yudsirüti tsü Jisu shüh-nü thsüthohjühcho ko Abüdongba tsurü ko tsularüti lile.
Adikehlang, General Superintendent of the Assembly of God, North East India Rev. Moses Murry-nü shibülungrüti apüm künyang khyüchohcho. Nyitsarü 20,000 o-shi shibülungcho ngude, chehcho-nü liba thüpcheh-ti ayung amüwanung ngununge-pü yocho.
Mütohzah, Dimapur District Autorickshaw Drivers’ Union-nü Nagaland Revival and Healing Festival 2025 bekhyah nengdang akhüluba khu trotanung müdhesohcho. Autorickshaw ti 20 – 30 o-shi amii mükhyüpü thüpcheh la zehrüti nengdang anyüzehlang 6 lanü anyüzehlang 9 tashi tronung müdhesohcho. Akhüluba dhsütahkhang hiba number (6009092221) la chotanung changtacho.