Jümü mübüyah, khi ko nyiichi-nü 26uba Hornbill Festival tsü Naga Heritage Village, Kisama la Kuhdrangnyü nyümong , 63uba Nagaland yangliza thrichehba nyümong te aroh dikehcho.
Hornbill Thsüti (Chengyong 1 – 10) tsü Nagarü liliyah ko akehta nguhsohba lile pü Nagaland Chief Minister Neiphu Rio-nü yocho. Akang liba jümüyah ko jümürü ti khyang jengreng jühba amüdhethsa nguhsohre pü changtacho.
Chükang Hornbill Festival la yanglih dhüroh te chingkeh dhrela thsacho (Austria, Malta, France, Ireland, UK ko Switzerland) ko Arunachal Pradesh tsü chingkehba yangliza thsacho pü changtacho.
Nagarü yukheh, atsüptsi ko jümüyangthsa hiri tsü khi, nyiichiba, jengki ko liyah khu thongusohre pü CM-nü changtacho.
Nagaland nengdang akohcho atsauba ko atikehcho yukheh changtanung nengdang, CM-nü shirüti ko shitsehrüti te langbürü thsanungba kichicho. Shirüti, ko shitsehrüti apüm atsauba lanü mungsohnung müküp nguchiyale pü mütohzah changtacho.
Nagaland acting Governor Ajay Kumar Bhalla-nü hiba thsüti tsü yangliza jümüthsiking, akehta ko atsüptsi ngusohba ko müdhesohba lile pü changtacho. Jümü chahnü roba jümüliyah ko lili hiri Nagarü apüm khüdu thsanü rikiba lile pü changtacho. Nagaland thsaxüküm, yuchoti, nyiichirü mülungti, shithsabhülehrüti ko khithsarüti apüm-nü mücijüh trotacho nengdang akünyang changtacho.
Bishop of Kohima, Reverend James Thoppil-nü adikeh dangkhidangnangcho ko Longwa yangdong lanü azirü asurocho kang 87 Tomwang-nü jümüyah müwajühcho. Nagarüti-nü liliyah ko jümüthsiking limih palang tashi ngusohcho nengdang State Minister for Tourism & Higher Education ko thsüti chehchoba Temjen Inma Along-nü akünyang changtacho