77uba United Sangtam Students’ Conference “Sühdi Shibülong” Tütheze yangdong la chünye-nü dikehcho
Yümüdong: ‘Ihsa jümüthsiking mürüpnü, nahdhingkeh lipü azikeh khyochoba’ (Roots, reflect, rise: Honouring our heritage, embracing growth, rising with purpose) chah jükeh akhudiba thüpcheh chünye USBLA Sub-Centre Kiphire Dr. H. Apise Sangtam-nü thüpcheh müzeh Dangkhidangnang jühcho ko MLA & Advisor Information Technology & Communication, Economics & Statistics and Evaluation, Nagaland Thsaxüküm Azii. H. Sethrongkyu Sangtam-nü Thüpcheh müzeh khangthrujühcho.
Akhudiba thüpcheh ko adikeh romang la Azii. H. Sethrongkyu tsü Nengkhong Shirü (Distinguised Guest) thsacho.
Thüpcheh aichi, You Lead Team-nü thüpcheh khangthru langye jühcho ko USSC Pümjirüti-nü thüpcheh ayung langnücho, Hd.GB Tütheze Azii. Rhangtsothe-nü throchehmütheh-nü rorü shirüti kyang künyang-nü khyüchocho ko Vice President USSC Azii. Suropi Sangtam-nü yupohtpheh nohlüm khyücho.
Secretary USBLA Kiphire sub-centre Dr. H. Apise-nü adikeh te Sangtamrü langnürüti, langnülarüti ko dikehrüti yutsidsa changtanü khüdu-nü khüdu jengreng jühta-nü linung apüm te changtacho. Mütohzah abi-nü yumüdong chah jükeh thsingyucho.
Nengsekhi 127:1 chah jükeh Alobe. Rotila Women Secretary USBLA nü azingtacho khihcho ko akhihzarüti nengdang Dangkhidangnang bekhyah khyücho.
Amahator Range Students’ Union ko Chare Area Students’ Union anyüh mülung-nü khi khu shibülong lirüti thsüchicho ko thüpcheh langye jühcho.
Nengkhong Shirü Azii. H. Sethrongkyu Sangtam-nü akhihrüti te ihsa jümüthsiking münüchinung ko Tsingrangba müthe-nü linung thsüchicho. Akhirüti te lümlong khüdu thsanü bekhu tsinung nengdang changtacho, hütsü khu yucho bekhu nowünung thsüchicho. Yucho amüi müchangsohnung ko isa akang lide dhrüze jühta linung nengdang dee lümdhingsohnyüre pü changtacho. Akangmüjüh khang lüpcho la akohmünguhre hütsüeko mücijühnung nengdang sü thsüchicho.
Adikeh de President Kiphire Lihyung San Nyahrü Amülung (KLSA) nü azengtacho khi dangkhidangnangcho
77uba USSC Sühdi Shimükhong tsü Tütheze yangdong (Longmatra Area, Kiphire District) la Süpeh 13, 2026 lanü dikeh Süpeh 15, 2025 nyümong tashi khyünung lile. Yusi khyüba tizah bekhyah, Lihyung 8 lanü yangdong/sühdi-yang 69 tashi rocho. Throchehmütherü-ti nyitsarü 1002 (Adhrerü 623, Khingkurü 302 ko akhüluba münyahrüti 77) nengthrahyohcho.