Azii. G. Kaito Aye-nü nengthsashü lehcheh-nü thüpcheh anyüuba dikehcho
Tütheze yangdong la 77uba United Sangtam Students’ Conference anyüuba thüpcheh anyangnyü Honourable Minister PWD (Roads & Bridges) Nagaland Thsaxüküm Azii. G. Kaito Aye-nü USSC nengthsashü lehcheh-nü thüpcheh dikehcho.
Nahdhingkeh: “Azengzahcho khunü akoh tsü ngunye shajade saying atsa tsü lidu lire.” (Beyond the finish line: the spirit of the game lives beyond victory) chah jükeh Alobe. Akala Rüdi (WSSU) ko Alopu. Lumthsingse (ARSU) anyüh-nü thüpcheh langnücho.
Thüpcheh la zehcho kyo, President USSC Azii. Adekhing I Sangtam-nü Presidential address yu chocho, President ENSSU Azii. Ninoto Z Katty-nü akehta nengdang yuchocho ko EAC Longmatra Azii. Takatemjen, NCS nü District administration nengla yuchocho.
Kiphire Village Students’ Union-nü Jümü ko ayohrüta (Folk fusion) khi thsanü lanye jühcho.
Thüpcheh adikeh de President, Seyochung Area San Nyahrü Amülung (SASA) nü azengtacho khi dangkhidangnangcho ko President, Sitimi Area Sangtam Pastors’ Fellowship-nü shaja dikehnung nengdang dangkhidangnangcho.
Thüpcheh zika pü shajangah la shajarüti-nü shaja-yuchüm khyücho ko Shirü Ayingba-nü dsibong takeh shaja ko pingba dikehcho
Azii. T. Yangseo Sangtam-nü USSC Sühdi Shibülong asanguba thüpcheh la tungte shirü thsa zehcho
Nahdhingkeh: ‘Chonung nengdang longphisohng, adhou thsanung nengdang mürusohng’ (Speak to ispire to speak, spell to excel) chah jükeh 77uba USSC Sühdi Shibülong, Tütheze yangdong la asanguba thüpcheh anyezehlang Former MLA & Deputy Speaker Nagaland Legislative Assembly Azii. T. Yangseo Sangtam-nü Tungte Shirü (Honoured Guest) thsa khyücho.
Asanguba thüpcheh tsü Alobe. Sichola Sangtam ko Alopu. Nuzise S. Sangtam anyüh-nü langnücho ko Dimapur lihyung San Nyahrü mülung President-nü azengtacho khi adikeh dangkhidangnangcho
Eastern Naga Students’ Federation, President Azii. Nuhemong Yimkhiung-nü Longthsungsoh ba yu khu akhihrü te thsüchicho.
Longmatra Area Students’ Union ko Longkhim Division Students’ Union arüh mülung anyüh-nü khongtikhi khu thüpcheh langnyejühcho
Azii. T. Yangseo-nü yumüdong chah jükeh, akhihba tu mah ta hütsü chah lahkeh nühyo jiyüh ko anyicheh aichi azikeh nengdang lümdhingnung dhsütahle pü changtacho ko akhihnung la bekhyah atsaubala-nü bichinung thsüchicho. Ihsa yucho la azirüti ko langnürüti adrong chah-nü nyichokhyünung sü yocho. Bekhulang nengdang ihsa-nü tu khüta nguchi rocho, hütsüri lümdhing-nü nyicho khyüng ko atsauba nengdang nyicho-nü nguchinung akhihrüti khyang thsüchicho. Atu limih ate akhihrüti-nü nowünung ba lile hütsüeko palu jiyüh ko anyicheh-ti yuje la bichi nguchinung thsüchicho.
Thüpcheh la zehcho kyo, atohta papa licho ko hiri licho: Thrahyah yutse yomülitaba ko yunah chomülitaba.
Mütohzah, thüpcheh thümying Azii. K. Chumseli Anar-nü langnü-nü, “Limih amüdhe I shangnung” yunah chah jükeh Nguchi Nyichoba licho ko Panelist hiri licho: Azii. R. Tsapikiu Sangtam Former President ENPO, Azii. Kiritong Chairman OTC Board of Directors, Azir. Thsatila Sangtam President AST ko Azii. Alison Associate Pastor KTBL.