Nahdhingkeh ‘Müngucheh la nüang’ chah jükeh United Sangtam Gazetted Officers’ Union (USGOU) kang 25 pisacho amüdhethsa lümkeh müzeh mungcho.
Thsütisümsüm 02 ko 03 nyümong Hopongkyu Memorial Hall, Kiphire Sühdiyang la thüpcheh khyü mungcho.
Advisor IT&C, Economics & Statistics, Evaluation Azii. Sethrongkyu Sangtam tsü Shirü Ayingba thsacho. Thsarah langnürüti ko Officers ti tsü lede nengdang mah ta amüshu nengdang lile ko hiba bekhyah khu müyurüti dikehnung thsathsa atsa lile pü abi-nü changtacho. Kang 25 lümkeh müzeh hi künyang mungcho tu mah ta tpurüti arüh akang jühba ko lasi lümlong khüdu thsa betrüm-nü nguchi ba hiri jengreng jühba lile. Kang 25 tashi la chehcho nguchiba hiri apüm tsü lümkeh-nü mütohzah keh khüdu thsa nguchinung thsüchire pü Azii. Sethrongkyu-nü changtacho.
Kanglicho kuthsi khüdu roh-i, müyurüti nengdang khüdederü linye atsauba nguchinung thsüchicho.
Tungte Shirü, Hon’ble Advisor Fire & Emergency Services, Home Guard & Civil Defence Azii. S. Kiusumew Yimchunger-nü Sangtamrü tungte mülung-ti te liyahmülung-ti kahla akehta linung nengdang mütohzah drengdrengnung ko müchimüchümba la dhrüze jüh külüpchinung changtacho.
Abi-nü sü Kiphire district la azikeh nengdang akohcho nguchi yale ko atsauba lanü dikeh yale pü changtacho
Pümji yupohtpheh la, Er. Alongse-nü akünyang changtacho. Lümkeh müzeh hi tsü Khutsiba lümkeh jengreng jühba, ate ko aronung nengdang külüpchiba lile pü abi-nü changtacho. USGOU pohki khiyoh 261 lile ko tungte mülung papa-ti apüm de chingkeh nguchiyale pü changtacho.
Thüpcheh la zehcho roh-i, Azii. S.J. Levi Keor General Secretary USGOU-nü nüpü asürü lümcheh ba bekhyah khyücho ko Rev. Imtiba ES USBLA-nü USGOU nengdang amüwanung ching dangkhidangnang bekhyah khyücho.
Müzeh-mung nyümong Seyochung Village Union Kiphire Town (Adhrerü) ko Kiphire Village Atparü Union Kiphire town (Khingkurü) arüh mülung anyüh-nü nyichicho, thsüti ko yulümta khyü akohngu changkacho.