Dimapur district la yongkha yatiba yuzeng tsü tohlinung nengdang mütohzah lümlong changta licho. Dee zingta-nü liba yuzeng, Nagaland Liquor Total Prohibition (NLTP) Act, 1989 nengdang, Naga Council Dimapur (NCD) te chingkeh Dimapur Urban Council Chairmen Federation (DUCCF) nü Chola 24 nyümong Dimapur la liba yucho 20 o-shi langnürüti te yukitaba licho.
Yangliza la ko tungte thsa Dimapur la yongkha tsü müyatichehba ko thangchi-nü nguhba nengdang dee lümtahjühcho pü DUCCF President, Zasivikho Zakiesato-nü yukitaba thümpü yusi hirüti te changtacho. Yulümta la achangsho-nü hiba yuzeng tsü zah-nü tohlisohnung nengdang lümchung changtacho ko achangsho-nü mütohzah thali yukitaba linung nengdang changtacho pü Zasivikho-nü yulümta khüta khyücho pü nyidhing te lalingcho.
Lümlong khüdu thsanung ko lümchung tikehnung nengdang mütohzah Süpeh 2026 choo la thali yulümtaba linung yocho. Dimapur district la liba yangdong ti ko yukharüpümji mülung te sü yukitaba linung changtacho.
Apüm-nü müdhe liba NLTP yuzeng dikehpü kang 36 tashi atsau mahpü amütsau dhingchehcho. Yongkha yatiba yuzeng tsü akoh müngu. Hütsüeko Dimapur la hiba yuzeng tsü mübichinung ko tohlisohnung nengdang phaqu khyünung dhrongchehcho. Chengyong 2023 la DUCCF-nü hiba yuzeng tohlisohnung nengdang Nagaland thsaxüküm te vathrahcho ko mütohzah thali Dimapur la liba mülungti papa-nü sü hiba yuzeng tohlinung nengdang Governor yang sü vathrahcho pü Zasivikho-nü changtacho.
Lithroti te khyangchiba mah ta; langnürüti thsacho khu, ate tikehyaba dhingcheh dee lümtahjühre pü changtacho.
Lithroti khyang jengreng jühre ta, ate tikehyaba suro dhingcheh, amülungti-nü dee lümtahjühcho pü Nagaland Baptist Church Council-nü Chola 18 nyümong yusihirü khu tsidsajühba chah lakeh DUCCF President Zakiesato-nü lalingjühcho. NLTP yuzeng tsü akoh müngucho. Hiri akoh münguba yuzeng ko nahdhingkeh müchiba yuzeng nengdang amülungti-nü külüpchinung ko nguchinung tsü aleng lile pü yocho.
Dee zingta-nü liba NLTP yuzeng tsü NBCC ko NMA-nü dee thsungcho khu yongkha yatinung nengdang Nagaland Thsaxüküm-nü yuzeng kangsohcho.