KBBB-nü Rev Longri Ao nengla nengthsalung khyümcho

Council of Baptist Churches in Assam (ate bichiba neng CBCNEI) nü Chola 20, 1950 nyümong akhudiba anbü yu shurü Rev. Longri Ao, Konyakrü lih la müthechücho amüdhethsa alümkehnung nengdang abi khyang jengreng jüh Wakching la Chola 20 nyümong nengthsalung khyümcho.

British thsaxüküm tsü 1913 la Konyakrü lih la rocho ko hütsüpü kyüsütaba tsü dee mülicho ta yangdongti kahla anyahli yubejarong ko adrüba tsü müchangka tu licho. Sakoliyahmülung kahla adrü-aring ko masü mübüba yah bichi lirocho. Hütsüba khyangchita liba shang la, Anbü yu shurü-ti ko anbü yu thsingyurü-ti nü akang jüh nguchi rocho. Ao Mungdang (ABAM) nü Konyakrü yangdong ti la 1949 kang tashi anbü yu thsingyurüti müthechü-nü nguchi rocho. Khodederü Rev. Longri Ao 1950 kang ro chicho, yang hiri: Tamlu, Kongan, Wanching, Wakching, Pongkong, Oting, Lapa ko Chingphoi la Khrista yudsirüti licho. Hiri akhu yudsirüti ko akhu anbü yu thsingyurüti zeh abi-nü nguchi dikehcho.

Rev. Longro Ao-nü Konyak müyurüti te 1950 lanü dikeh 1967 tashi dikehcho ko hütsüba bekhyah amülichiba bekhyah thsacho. Abi-nü yudsi chah jükeh, liliyah ko suro lili la amülichiba ko müyurü kahla yangthsa külüpchiba nguchi adrong nguchicho.

Kang 75 pisacho amüdhethsa mungte, KBBB-nü abi nengla ko abi khyang jengreng jüh nengthsalung khyümcho ko KBBB Executive Secretary Rev. L Metjen Konyak-nü Dangkhidangnang khyü müzeh khangthrujühcho.

Hiba nengthsalung tsü akhu anbü yu shurü-ti nü akang jüh nguchiba ko Abüdongba amüi ko longlangchehba yuzi thsare pü Rev. Metjen-nü changtacho. Kang 75 pisa mungte, mütohzah Rev. Longri Ao ko akhu anbü yu thsingyurüti nü nguchi roba hiri lümkeh yudsi la alaa drengdrengnung changtacho.

Hiba kang 75 pisacho müzeh thüpcheh la Lithro langnürüti, azibarüti, kunu ko sakoliyahmülung müyurüti zeh mungcho