Non-SCS Officers-ti IAS la khiyoh jühba nengdang Pen-down strike thsanü Yangliza Dochungkuh nguchinguyang la müyurüti chah chongcha mütohcho khu Eastern Nagaland Women’s Organisation-nü soh lümdhingjühcho.
ENWO-nü yocho, Indian Administrative Service (IAS) la khiyoh jühba tsü All India Services Act 1951 pohki IAS (Recruitment) Rules 1954 ko IAS (Appointment by selection) Regulations 1997 aichi trore mahkhang khiyohjühre. IAS tsü Yangliza Service mah, ta All India Service lile ko IAS la Induction thsanung nengdang Department of Personnel & Training (DoPT) nü UPSC yuzeng aichi throjühba tsü yuje la nguchicho.
Officers-ti IAS la induct thsaba la, Yangliza Thsaxüküm-nü DoPT anguchinung dhingcheh aichi nguchiba la aparü-nü mükhyüchoba mahkhang tsonglisohba müthsasohnyüre. Centre-nü dhingyeh yuzeng aichi nguchiba la dongzijühba müthsasohnyüre. Thsaxüküm-nü lüpcho anguchinung ti dhingkya-nü rungnüm nguchicho la mücikyang dhingchehcho pü changtacho.
Müyurüti ko suro nyitsarüti adrong dochungkuh nguchi la achongcha mütohcho lümdhingjühcho ko ENWO tsü atparü mülung thsacho khu Thsaxüküm nguchi la nguchirüti te pen-down strike thsa rumüsuba tsü tohlinung kichicho ko hi khu dochung nguchiti thali atsubalanü nguchinung changtacho.